ဇိုးတို့၏နယ်မြေ သို့မဟုတ် ရန်ကုန်
၂၀၁၈ စက်တင်ဘာလ ၁၁ ရက် ညနေ ၅ နာရီအချိန်။
တာမွေမြို့နယ် (က)ရပ်ကွက်သည် ရန်ကုန်မြို့လယ်ခေါင်တို့၏ ထုံးစံအတိုင်း လူအများဖြင့် စည်ကားလျက် ရှိသည်။ ထိုအနီးအနားတွင် ညပိုင်းဈေးရောင်းလျက်ရှိသော ကိုတင်မောင်သည် ရုတ်တရက် အော်ဟစ်သံများကြောင့် ဈေဗန်းကို အသာချကာ စပ်စုကြည့်လိုက်သည်။
Alphard အမျိုးအစား ယာဉ်တစ်စီးပေါ်မှ တုတ်၊ ဓားကိုင်ဆောင်သော လူတစ်စုသည် အော်ဟစ်ဆဲဆိုလျက် ပြေးသွားသည်ကို မြင်လိုက်ရသည်။ နောက်ထပ် ယာဉ်နှစ်စီးထပ်ရောက်လာပြီးနောက် တုတ်၊ ဓားကိုင်လူများ ထပ်ဆင်းလာသည်။
မြို့လယ် လူစည်ကားရာအရပ် သွေးစက်တို့ စွန်းထင်းသွားပြီ ဖြစ်သည်။
အဆိုပါရန်ပွဲပြီးသွားသည့်နောက် လဲကျနေသည့် လူနှစ်ဦးနှင့် အမျိုးသမီးများထံ ပထမဆုံးပြေးသွားမိသူမှာ ကိုတင်မောင် ဖြစ်သည်။
“လဲနေတဲ့ ကိုကတုံးကို ကျွန်တော် သိတယ်။ သူ့ကို ကူညီဖို့ ကျွန်တော် သွားခဲ့တာ။ ဒါပေမဲ့ ကားတွေက ရပ်မပေးခဲ့ဘူး” ဟု သူက ဆိုသည်။
ထိုညက တာမွေသည် ကမ္ဘာပျက်သလို ဆူညံပွက်လောရိုက်ပြီးနောက် ပတ်ဝန်းကျင်တစ်ခုလုံး အထိတ်တလန့် ဖြစ်ခဲ့ရသည်။
အဆိုပါရန်ပွဲသည် သာမန်ရန်ပွဲတစ်ခု ဖြစ်ပွားခဲ့ခြင်း မဟုတ်။
ရန်ကုန်သားတို့က ဗန်းစကားဖြင့် ဇိုးဟု ခေါ်သော လူဆိုးဂိုဏ်းတို့၏ လူသတ်ပွဲတစ်ခု ဖြစ်ခဲ့လေသည်။
ထိုလူသတ်ပွဲတွင် ရန်ကုန်မြို့မှ နာမည်ကျော် လူဆိုးဂိုဏ်းခေါင်းဆောင် ဝင်းထွဋ်ဝင်း၊ အခြားနာမည်ကျော် လူမိုက်ဖြစ်သော ယဉ်မိုးအပါအဝင် လူမိုက်ရှစ်ဦး ပါဝင်ခဲ့လေသည်။
ဖြစ်စဉ်တွင် လူဆိုးအဖွဲ့၏ တိုက်ခိုက်ခံရသူမိသားစုမှ ကတုံးမ(ခ)ဇော်ဟိန်းသူမှာ သေဆုံးသွားခဲ့ပြီး ကျန်နှစ်ဦးမှာ ဒဏ်ရာများ အပြင်းအထန် ရရှိသွားခဲ့သည်။ ကျူးလွန်သူများကိုလည်း ရဲတပ်ဖွဲ့က သေနတ်ဖြင့် ပစ်ခတ်ဖမ်းဆီးခဲ့ရသည်အထိ ဖြစ်ခဲ့၏။
အဆိုပါဖြစ်ရပ်မှာ ရန်ကုန်မြို့ တရားဥပဒေစိုးမိုးမှုမျက်နှာစာ၏ တစ်ဖက်ခြမ်းတွင်ရှိသော လူမိုက်လောက (ခေါ်) ဇိုးလောက၏ တိုက်ပွဲများထဲမှ တစ်ခုသာ ဖြစ်သည်။
တာမွေလူသတ်မှုမှ ကျူးလွန်သူများကို တာမွေမြို့နယ် တရားရုံးတွင် ရမန်ရယူခဲ့စဉ်။
ဇိုးလောက
ရန်ကုန်မြို့တွင် ၂၀၀၁ ခုနှစ် နောက်ပိုင်း စကော်ပီယံကဲ့သို့ နာမည်ကြီးလူမိုက်ဂိုဏ်းများကို သက်ဆိုင်ရာက ဖြိုခွင်းခဲ့သဖြင့် ငြိမ်သက်သွားခဲ့သည်။ သို့သော်လည်း ၂၀၀၈ ခုနှစ်နောက်ပိုင်းတွင် လူမိုက်အဖွဲ့များမှာ ပုံစံတစ်မျိုးဖြင့် ပြန်လည်အားကောင်းလာခဲ့သည်။
သက်ဆိုင်ရာမြို့နယ်များအလိုက် နာမည်ကြီးလူမိုက်များနှင့် ၎င်းတို့၏ နောက်လိုက်များက အုပ်စုဖွဲ့ ပြန်လည် စိုးမိုးလာကြသည်။
လူမိုက်အဖွဲ့များသည် ကေတီဗီ၊ အနှိပ်ခန်း၊ ပြည့်တန်ဆာ အစရှိသော လုပ်ငန်းများကို အကာအကွယ်ပေးခြင်း အပြင် ယခုနောက်ပိုင်းတွင် အကြွေးတောင်းပေးခြင်း၊ အငှားလူရိုက်ပေးခြင်း ၊ ကားဖြင့် တိုက်ပေးခြင်း၊ လူစားဝင်ပေးခြင်းအပြင် လူသတ်ပေးခြင်းတို့အထိ တွင်ကျယ်လာခဲ့သည်။
အထူးသဖြင့် ဆင်ခြေဖုံးမြို့နယ်များဖြစ်သော သာကေတ၊ ရွှေပြည်သာ၊ လှိုင်သာယာတို့တွင် နာမည်ကျော် လူမိုက်များ ကြီးစိုးလာခဲ့သည်။ သာကေတတွင် မြင့်အောင်၊ နေမျိုးအောင်၊ ဝင်းထွဋ်ဝင်း၊ တင်လင်းထိုက် (ခ) ထိုက်ထိုက်၊ လှိုင်သာယာတွင် အောင်စိုးလေး၊ ဝင်းနိုင် စသော နာမည်ကျော် တစ်ပိုင်စားလူမိုက်များ ပေါ်ပေါက်ခဲ့သည်။
၂၀၁၀ မှ ၂၀၁၅ ခုနှစ်အတွင်း ဆင်ခြေဖုံးဒေသများတွင် ကျူးကျော်ကိစ္စများ ပေါ်ပေါက်လာခဲ့ပြီး အစိုးရ ကိုင်တွယ်မရသည့် ကျူးကျော်ပြသနာအချို့တွင် လုပ်ငန်းရှင်များက နယ်မြေခံလူမိုက်အဖွဲ့များ ကို အားကိုးလာကြသည်။
သို့သော်ထူးခြားသည်က ထိုကျူးကျော်များကို ရှင်းလင်းပေးသည်က နယ်မြေခံလူမိုက်အဖွဲ့များ ဖြစ်သကဲ့သို့ ကျူးကျော်ကြသူများမှာလည်း ထိုလူမိုက်အဖွဲ့များနှင့် ပတ်သက်သူများ ဖြစ်နေခြင်းပင်။
ကျူးလူမိုက်များ ဆိုသည့် စကားသည် ဆင်ခြေဖုံးဒေသများတွင် ထွန်းကားခဲ့ပြီး ကျူးကျော်အဖြစ်နေထိုင်ပြီး ဖယ်ရှားပေးရသည့်အခါ လျော်ကြေးယူသည့် စီးပွားရေးပင် ပေါ်ထွန်းလာခဲ့သည်။ အဆိုပါကိစ္စများသည် လှိုင်သာယာတွင်မူ နာမည်ကြီးသည်။ ဥပဒေစိုးမိုးမှုကို မခံစားကြရသည့် ဒေသခံတို့မှာလည်း လူမိုက်တို့အကြောင်း ဟဟမျှပင် မဖွင့်ဟရဲကြ။
ထိုအလေ့အထနှင့်အတူ လူမိုက်ဂိုဏ်းများမှာ ငွေကြေးကြွယ်ဝလာကြပြီး နိုင်ငံ၏ ထိပ်ပိုင်းသူဌေးများ၊ အာဏာပိုင်အချို့၏ လက်စွဲတော်များဖြစ်လာကြသည်ဟု အဆိုပါလောကနှင့် နီးစပ်ခဲ့သူ ရွှေပြည်သာမြို့နယ်နေ လူငယ်တစ်ဦးက ဆိုသည်။
လူမိုက်တို့၏ နောက်ထပ် ဆုံစည်းရာ နေရာမှာ ကြက်တိုက်သည့် လောင်းကစားဝိုင်းများဖြစ်သည်။ ထိုလောင်းကစားဝိုင်းများတွင် သန်းနှင့်ချီသော လောင်းကြေးများ ပါဝင်တတ်ပြီး နာမည်ကျော် ရုပ်ရှင်သရုပ်ဆောင်များပင် လာလေ့ရှိကြသည်။ လူမိုက်အဖွဲ့များသည် သူ့အပိုင်စားအလိုက် ကြက်ဝိုင်းများ ကျင်းပလေ့ရှိကြပြီး ဝင်ငွေရှာလေ့ရှိကြပြန်သည်။
အင်အားကြီးလူမိုက်အဖွဲ့များသည် မူးယစ်ဆေးဝါးလုပ်ငန်းများအထိပါ နယ်မြေ ချဲ့ထွင် လုပ်ကိုင်လာကြောင်း ကြေးစားလူမိုက်အဖွဲ့များနှင့် နီးစပ်သူများထံမှ သိရသည်။
နာမည်ကျော် စီးပွားရေးလုပ်ငန်းရှင် အချို့ကလည်း လူမိုက်အဖွဲ့များကို ခါးပိုက်ဆောင်အဖြစ် လက်သပ်မွေးထားလေ့ရှိပြီး ဥပဒေဖြင့် ညှိနှိုင်းမရသော ၎င်းတို့၏ အချို့သော စီးပွားရေး၊ လူမှုရေးကိစ္စများတွင် အဆိုပါ လူမိုက်အဖွဲ့များကို အသုံးချလေ့ရှိကြကြောင်းလည်း သိရသည်။
စီးပွားရေးလုပ်ငန်းရှင်ကြီးများ၏ အမည်မခံသည့် လုပ်ငန်းများဖြစ်သည့် နိုက်ကလပ်၊ စင်တင်တေးဂီတ၊ ကေတီဗီ အစရှိသည်တို့တွင်လည်း ယင်းလူမိုက်အဖွဲ့မှ အဖွဲ့ဝင်များကို ဝန်ထမ်းအဖြစ် အသုံးပြုသည်လည်း ရှိသည်ဟု လူမိုက်အဖွဲ့များနှင့် နီးစပ်သူတစ်ဦးက ဆိုသည်။
၂၀၁၃ ခုနှစ် ဒီဇင်ဘာလက ဖြစ်ပွားခဲ့သော နာမည်ကျော် မြောက်ဥက္ကလာပ လူသတ်မှုသည် အခကြေးငွေဖြင့် လူသတ်ပေးသော ကြေးစားလူမိုက်များစွာ ပါဝင်ခဲ့သည့် အမှုတစ်ခုဖြစ်သည်။
အဆိုပါအမှုတွင် ကိုကျော်မင်းဆိုသူအား သတ်ပေးရန်အတွက် လူမိုက်များက ငွေကျပ် သိန်း ၉၀ အခကြေးငွေ အဖြစ် ရယူကာ လက်ခံခဲ့ခြင်းဖြစ်ကြောင်း စစ်ဆေးပေါ်ပေါက်ခဲ့သည်။
“ကွဲရုံဆို တစ်သိန်း၊ ကျိုးရုံဆို သုံးသိန်း အစချီပြီး တစ်ဖက်သားအပေါ် ကိုယ်ဖြစ်ချင်တဲ့ အနေအထားကို ဈေး စကားပြောပြီး ညှိလို့ရတယ်။ အပျောက်ရှင်းရင်ကတော့ သူ့ဈေးနဲ့သူ ဆိုပြီး အသီးသီး သတ်မှတ်ထားပါတယ်။ အပျောက်ရှင်းရင်တောင် ပေးရတာ သိန်းတစ်ရာ မကျော်ပါဘူး”ဟု ကြေးစားလူမိုက်ငှားရမ်းခနှုန်းထားများနှင့် ပတ်သက်ပြီး ကိစ္စတစ်ခုတွင် ကြေးစားလူမိုက်များအား ချိတ်ဆက်ငှားရမ်းခဲ့ဖူးသူ လမ်းမတော်မြို့နယ်မှ အသက် ၂၇ နှစ် အရွယ် ကိုရဲလင်းက ရှင်းပြသည်။
လူမိုက်အဖွဲ့များ၏ အခြားဝင်ငွေရှာဖွေသော လုပ်ငန်းတစ်ခုမှာ ပြစ်မှုကျူး လွန်သူများကို လူစားလဲပြီး အမှုရင်ဆိုင်ပေးခြင်းဖြစ်သည်။
“သိန်းနှစ်ဆယ် ပေးခဲ့ရပါတယ်။ ယာဉ်တိုက်မှုမှာပါ။ ကိုယ်က ထောင်ထဲ မနေချင်တော့လည်း တန်တယ်လို့ပဲ ယူဆပါတယ်” ဟု ယာဉ်တိုက်မှုတစ်ခုတွင် လူစားထိုးရန် ငှားရမ်းခဲ့ဖူးသူ မရမ်းကုန်းမြို့နယ်မှ ကိုစိုင်းနောင် (အမည်လွှဲ) က ပြောပြသည် ။
ကိုစိုင်းနောင်သည် ရန်ကုန်မြို့တစ်နေရာတွင် ယာဉ်တိုက်မှုတစ်ခု ဖြစ်ပွားရာတွင် တိုက်ခံရသူမှာ သေဆုံးသွားခဲ့ပြီးနောက် ယာဉ်ကို မောင်းပြေးလာခဲ့ကြောင်း၊ ထို့နောက် မြောက်ဥက္ကလာမြို့နယ်ရှိ လူမိုက်အုပ်စုတစ်စုနှင့် ဆက်သွယ်မိကာ ကိုစိုင်းနောင်အစား လူမိုက်အဖွဲ့ဝင်တစ်ဦးက တရားခံအဖြစ် ရဲစခန်းတွင် သွားရောက်အဖမ်းခံခဲ့ကြောင်း ၎င်းက ဆိုသည်။
ထိုအတွက် လူမိုက်အဖွဲ့ကို ကျပ်သိန်းနှစ်ဆယ်ပေးခဲ့ရပြီး လူစားလဲ အဖမ်းခံပေးသူ၏ တရားစရိတ်နှင့် ထောင်တွင်းစရိတ်များကို ကျခံပေးခဲ့ရကြောင်း ကိုစိုင်းနောင်က ဆိုသည်။
ဩဂုတ်လ ၂၈ ရက်နေ့ နေ့လယ်ခင်းကလည်း သာကေတမြို့နယ် (၁၀) တောင် (၁၃) ရပ်ကွက် ခိုင်ရွှေဝါလမ်းပေါ်တွင် နာမည်ကျော် လူမိုက်အုပ်စု နှစ်စုကြား မင်းမဲ့စရိုက်ဆန်သော ခိုက်ရန် ဖြစ်ပွားမှုတစ်ခု ဖြစ်ပွားခဲ့သည်။
အဆိုပါဖြစ်စဉ်တွင် ပါဝင်သူများမှာ သာကေတမြို့နယ်အတွင်းမှ နာမည်ကြီး လူမိုက်မြင့်အောင်အဖွဲ့နှင့် နေမျိုးအောင်၏ လူမိုက်အဖွဲ့အသစ်တို့ကြား ဗိုလ်လုကြခြင်းဖြစ်ကြောင်း သာကေတမြို့နယ် (၁၀) တောင်ရပ်ကွက်နေသူ ရပ်မိရပ်ဖ တစ်ဦးက ပြောပြသည်။
အဆိုပါရန်ပွဲတွင် လူမိုက်အဖွဲ့တစ်ဖွဲ့၏ ခေါင်းဆောင်ဖြစ်သူက သေနတ်နှစ်ချက်ပစ်ဖောက်ခဲ့သည်ဟု ရပ်ကွက်နေ ပြည်သူများက ပြောကြားသည်။ သို့သော်လည်း သာကေတမြို့နယ် နယ်မြေ(၁) ရဲစခန်းကမူ ဗျောက်အိုးဖောက်သံသာ ဖြစ်ကြောင်း သတင်းမီဒီယာများသို့ ပြန်လည်ရှင်းလင်းခဲ့သည်။
သေနတ်ပစ်ဖောက်သည်ဟု လူအများက ယူဆခဲ့သောအဖွဲ့မှ အဖွဲ့ခေါင်းဆောင်သည် ငြိမ်းချမ်းရေး လက်နက်ကိုင်အဖွဲ့အစည်းတစ်ခုဖြစ်သော DKBK နှင့် ပတ်သက်မှုရှိသည်ဟု သာကေတမြို့နယ်အတွင်း နာမည်ကျော်သူတစ်ဦး ဖြစ်သည်။
“သူ့ကျောင်းသား၊ ကိုယ့်ကျောင်းသား အချင်းချင်း ငြိကြရာက ခေါင်းဆောင်တွေပါ ပါလာတဲ့သဘောပါ။ နာမည် ထွက်လာတဲ့ အဖွဲ့သစ်နဲ့ ရှိပြီးသားအဖွဲ့တို့ အားစမ်းတဲ့ သဘောလည်း ပါမှာပေါ့” ဟု သာကေမြို့နယ်အတွင်း အဆိုပါနှစ်ဖွဲ့လုံးနှင့် နီးစပ်သူ ကိုကျော်လင်းသူ(အမည်လွှဲ) က ပြောပြသည်။
ကျောင်းသားဟူသော အသုံးအနှုန်းသည် လူမိုက်အဖွဲ့များအတွင်း သုံးနှုန်းလေ့ရှိသော ဗန်းစကားတစ်ခုလည်း ဖြစ်ပြီး ကျောင်းသားဆိုသည်မှာ ရပ်ကွက်အတွင်း လူမိုက်ခေါင်းဆောင်များက မွေးထားသော လက်ရဲဇက်ရဲ လူငယ်လေးများ၊ ဆိုးသွမ်းခက်ထန်သော လူငယ်လေးများ၊ ပြစ်မှုကျူးလွန်ဖူးသူ လူငယ်လေးများကို ခေါ်ကြခြင်း ဖြစ်သည်။
၂၀၁၅ ခုနှစ် အစိုးရသစ်တက်ပြီးနောက်ပိုင်းတွင်မူ သာကေတမြို့နယ်ရှိ လူမိုက်အချို့၏ လှုပ်ရှားမှုများမှာ နိုင်ငံရေးနှင့် ပါဝင်ပတ်သက်လာပြန်သည်။
တရားခံပြေးတစ်ဦးဖြစ်ပြီး သာကေတမြို့နယ်မှ နာမည်ကြီးချဲဒိုင် လူမိုက်တစ်ဦးဖြစ်သူ တင်လင်းထိုက်သည် ယခုအခါ ဖျက်သိမ်းခဲ့ပြီးသော အမျိုးဘာသာသာသနာစောင့်ရှောက်ရေးအဖွဲ့(မဘသ) ၏ အမာခံတစ်ဦး ဖြစ်ခဲ့ပြီး ဆန္ဒပြပွဲများတွင် လူစုပေးရသူတစ်ဦးဖြစ်ကြောင်း ထိုရပ်ကွက်တွင် နေထိုင်သူများထံမှ သိရသည်။
၎င်းသည် ဆန္ဒပြပွဲများတွင် နေ့စားနှုန်းထားဖြင့် လူငှားပေးရခြင်းကို ဝင်းထွဋ်ဝင်းကဲ့သို့ လူမိုက်အဖွဲ့များနှင့် ထပ်မံချိတ်ဆက်လုပ်ဆောင်ခဲ့သည်။
အမျိုးသားဒီမိုကရေစီအဖွဲ့ချုပ် ဥပဒေအကြံပေး ဦးကိုနီ လေယာဉ်ကွင်းတွင် လုပ်ကြံခံရသောအမှုတွင် ပတ်သက်ခဲ့ဖူးသူ နဂါးလေးသည် ဝင်းထွဋ်ဝင်းနှင့် ခင်မင်ရင်းနှီးသည့် မိတ်ဆွေတစ်ဦးလည်း ဖြစ်သည်။
ဝိသမတို့၏လက်ပါးစေ
၂၀၁၈ ခုနှစ် စက်တင်ဘာလ ၁၁ ရက် ညနေ ၅ နာရီအချိန် တာမွေမြို့နယ်တွင် ဖြစ်ပွားခဲ့သော လူသတ်မှုတွင် သာကေတမြို့နယ်မှ နာမည်ကျော် လူမိုက်ဂိုဏ်းခေါင်းဆောင် ဝင်းထွဋ်ဝင်း ကိုယ်တိုင် ပါဝင်လာခဲ့သည်။
ဝင်းထွဋ်ဝင်းသည် ၂၀၁၆ ခုနှစ် ဇန်နဝါရီလ ၁၆ ရက် ညပိုင်းက တိုက်ခန်းပိုင်ဆိုင်မှုအငြင်းပွားနေသော အနော်ရထာလမ်းရှိ Pacific ဓာတ်ပုံတိုက်မှ ပိုင်ရှင်ဖြစ်သူ အသက် ၅၄ နှစ်အရွယ် အမျိုးသားကို လမ်းမတော် ၁၀ လမ်းတွင် ပြန်ပေးဆွဲခဲ့သည့်အမှုတွင် ခေါင်းဆောင်အဖြစ် ပါဝင်ခဲ့သူဖြစ်သည်။
လူဆိုးဂိုဏ်းခေါင်းဆောင် ဝင်းထွဋ်ဝင်း
စက်တင်ဘာ ၁၁ ရက်နေ့က ၇၇၇ ဂိမ်းဆိုင်တွင် ဖြစ်ပွားခဲ့သည့် ဖြစ်စဉ်သည် ကလေးချင်းစကားများသည့် ကိစ္စမှ ဖြစ်ခဲ့သည်ဟု ထွက်ဆိုကြသော်လည်း နောက်ကွယ်တွင် များစွာသော အကြောင်းအရာများရှိကြောင်း လူမိုက်အဖွဲ့များနှင့် ပတ်သက်နေသည့် အမည်မဖော်လိုသူများက ထုတ်ဖော်ပြောဆိုကြသည်။
မှုခင်းဖြစ်ပွားရာ ဂိမ်းဆိုင်သည် ကျိုက္ကဆံလမ်းမပေါ်တွင် တည်ရှိပြီး ရဲတပ်ဖွဲ့က ဖော်ပြထားသကဲ့သို့ ကလေးကစားသည့် ဂိမ်းဆိုင်မဟုတ်ဘဲ အကြွေစေ့ဖြင့် ကစားရပြီး ငွေကြေးလဲလှယ်ရသော ကာစီနို လောင်းကစားဝိုင်းတစ်ခုဖြစ်သည်ဟု ရပ်ကွက်နေပြည်သူများက ဆိုကြသည်။
ယင်းကဲ့သို့ ကလေးကစားသည့် ဂိမ်းဆိုင်အသွင်ယူ လောင်းကစားဝိုင်းများမှာ ရန်ကုန်မြို့တွင် ဆယ်ဆိုင်ထက် မနည်း ရှိနေပြန်သည်။
ထိုဆိုင်များကို ငြိမ်းချမ်းရေးလက်နက်ကိုင်အဖွဲ့အစည်းအချို့ အမည်ခံထားသည့် ထိုင်ဝမ်နိုင်ငံသားတစ်ဦးက ချုပ်ကိုင်ထားခြင်းဖြစ်သည်။
စည်ပင်သာယာတွင် ကလေးကစားကွင်း လိုင်စင်တင်ထားသော အဆိုပါဆိုင်များမှာ ငါးပစ်ဂိမ်း၊ မိချောင်း ဂိမ်း၊ ဂျက်ဘော့စက်၊ ဖဲစက်၊ အသီးစက် စသည့် ကာစီနိုကစားနည်းများရှိပြီး လောင်းကြေး ကျပ်သိန်းဆယ်ဂဏန်းချီကာ အလောင်းအစားပြုလုပ်ကြခြင်း ဖြစ်သည်။
Photo by yangon police
အဆိုပါ ထိုင်ဝမ်နိုင်ငံသားမှာ နှစ်ရှည်ဗီဇာဖြင့်နေထိုင်ပြီး သူပိုင်ဆိုင်သည့် လောင်းကစားဝိုင်းများတွင် နယ်ခံ လူမိုက်များကို လိုင်းကြေးပေးခြင်း၊ သက်ဆိုင်ရာ အဖွဲ့အစည်းများကို လာဘ်ထိုးခြင်းဖြင့် ရပ်တည်နေခြင်း ဖြစ်သည်။
အခင်းဖြစ်ပွားရာ ဂိမ်းဆိုင်မှာ ဝင်းထွဋ်ဝင်းလူမိုက်အဖွဲ့၏ စောင့်ရှောက်မှုအောက်တွင်ရှိပြီး တစ်လလျှင် စောင့်ရှောက်ခ ရှစ်သိန်း ၊ ဘော်ဒါကြေး တစ်သိန်း ပေးဆောင်ရသည်။
အဆိုပါဆိုင်တွင် လာရောက်ကစားသူများတွင် လူမိုက်အဖွဲ့များပါဝင်ပြီး နယ်မြေခံ လူမိုက်စရှိသည့် လူငယ်အချို့နှင့် လူမိုက်ဂိုဏ်းများ၏ ကာလရှည်ကြာ အငြိုးအတေးမှ ပွင့်ထွက်သွားသည့် ရန်ပွဲဖြစ်ကြောင်း ခိုင်မာသည့် သတင်းရင်းမြစ်များက အတည်ပြုပြောဆိုသည်။
အဆိုပါ လူသတ်မှုတွင် ပါဝင်ခဲ့သည့် လူမိုက်အဖွဲ့များကို ရဲတပ်ဖွဲ့က ဖမ်းဆီးပြီး နောက်တစ်နေ့ စက်တင်ဘာ ၁၂ ရက် ညနေပိုင်း တာမွေတရားရုံးတွင် ချုပ်ရက် ရမန်ယူရာတွင် အခြားအမှုတွဲများမှာ အချုပ်ယာဉ်များနှင့် ရုံးထုတ်လာကြသော်လည်း နာမည်ကျော်လူမိုက်ခေါင်းဆောင် ဝင်းထွဋ်ဝင်းမှာ ဇိမ်ခံယာဉ် အကောင်းစားဖြင့် ရုပ်ရှင်ဆန်ဆန် ရုံးထုတ်လာခဲ့သည်။
ပြည်သူများအကြား အဆိုပါမြင်ကွင်းသည် အံ့ဩစရာဖြစ်ခဲ့သော်လည်း ရဲတပ်ဖွဲ့ဝင်များကမူ လူမိုက်ခေါင်းဆောင်နှင့် ဆက်နွှယ်သူများကိုပင် ကျိုးကျိုးနွံနွံ ဆက်ဆံနေကြသည်ကို တွေ့ခဲ့ကြရသည်။
တာမွေလူသတ်မှုမှ ကျူးလွန်သူများကို တာမွေမြို့နယ် တရားရုံးတွင် ရမန်ရယူခဲ့စဉ်။
ယခုဆောင်းပါးပါ အချက်အလက်များသည် ရန်ကုန်မြို့လူမိုက်လောက ခေါ် တစ်နည်းအားဖြင့် ဇိုးလောကနှင့် ပတ်သက်ခဲ့သူများထံမှရရှိသည့် သတင်းအချက်အလက်များသာ ဖြစ်သည်။ တရား ဥပဒေစိုးမိုးမှုကို ပေါ်ပေါ်ထင်ထင် စိန်ခေါ်နေသည့် လူမိုက်အဖွဲ့များ၏ ခြိမ်းခြောက်ရန်ပြုမည်ကို စိုးရိမ်သောကြောင့် သတင်းရင်းမြစ်များက အမည်ခံပြောဆိုနိုင်ခြင်း မရှိကြပေ။
မည်သို့ပင်ဆိုစေ ပြည်သူလူထုအတွက် ရန်ကုန်ရှိ လူမိုက်ဂိုဏ်းတို့ နယ်မြေလုစစ်ပွဲများနှင့် ခြိမ်းခြောက်မှုများသည် တရားဥပဒေစိုးမိုးရေးအပေါ် မေးခွန်းထုတ်စရာဖြစ်လာခဲ့သည်။
အထူးသဖြင့် ပြည်သူ့မျက်မှောက်တွင်ပင် တွေ့မြင်ရသည့် လူမိုက်ဂိုဏ်းခေါင်းဆောင်များနှင့် ရဲတပ်ဖွဲ့ဝင်အချို့၏ ဆက်ဆံရေးအပေါ် ပြည်သူများ စိုးရိမ်ထိတ်လန့်နေကြသည်မှာ အမှန်ပင်ဖြစ်တော့သည်။
No comments:
Post a Comment